Aan die stuur van Onverwag se sake is ‘n span uiters toegewyde vrywilligers wat hulle tyd en talente gebruik om seker te maak alles verloop seepglad. Hulle sien om na die dag-tot-dag bedrywighede van die buurtwag, sowel as Onverwag se verhoudings met ander wetstoepassingsagentskappe en nie-winsgewende organisasies.

Onverwag het aanvanklik net van aktiewe patrollering gebruik gemaak, met opgeleide patrolleerders uit die gemeenskap. Danksy die vrygewigheid van ‘n groep inwoners se skenkings kon 26 kameras geïnstalleer word en Cam Live Vision het ons ‘n afslag op die 24/7 monitering aangebied. Die kombinasie van al hierdie faktore het gelei tot ‘n drastiese verlaging van die misdaadsyfer en die arrestasies van ‘n indrukwekkende aantal misdadigers.

Ongelukkig is dit onmoontlik om hierdie tipe diens te verskaf sonder om onkostes te beloop. Daarom het Onverwag die voortou geneem toe dit nodig was om ‘n Spesiale Aanslaggebied (Special Rating Area / SRA) te skep. Ons weet dit klink aanvanklik gekompliseerd, maar glo ons as ons sê, dit is eintlik heel eenvoudig. Die Onrus Vermont Spesiale Aanslaggebied (OVSAG) werk so: Elke eienaar van eiendom in die area betaal ‘n maandelikse heffing bo-op hulle gewone munisipale heffing en so word die fondse ingesamel om te betaal vir die 24/7 CCTV monitering. Al die inwoners kan rustig slaap in die nag, wetende Onverwag sal ‘n ogie hou.