Misdaad sal heelwaarskynlik altyd ‘n realiteit wees in ons gemeenskap. Maar soos die tye verander, verander die aard van die misdade waarvoor ons moet uitkyk. Juis as gevolg van tegnologiese ontwikkeling ervaar ons tans ‘n skerp styging in aanlynmisdade in ons gemeenskap.

Om dit te bestry het Onverwag ‘n algemene vergadering gehou om bewusmaking te kweek oor die probleem. Daarna het hulle ‘n reeks Cell Savvy werkswinkels geloots om ouer gemeenskapslede raad te gee oor hoe om hulle toestelle op ‘n veiliger manier te gebruik en makliker raak te sien wanneer iemand hulle probeer verneuk. Dit is ‘n voordurende proses omdat die skelmstreke feitlik daagliks ‘n ander vorm aanneem. Hou ‘n ogie op die Nuutste Nuus bladsy van ons webwerf vir wenke oor hoe om jou aanlyn sekuriteit op te skerp. 

Onverwag was in die voorste linie toe daar rampbestuur toegepas moes word na die onlangse vloede in die Overbergstreek. Ons het nou met die munisipaliteit saamgewerk in hulle pogings om elektrisiteit en lopende water na inwoners se huise te herstel. Ons het ook getrou die gemeenskap op hoogte gehou van enige verwikkelinge deur middel van ons interaktiewe WhatsApp groepe en sosiale media.